Þríeykið stofnar Hreyfinguna

Þingmennirnir Birgitta Jónsdóttir, Margrét Tryggvadóttir og Þór Saari hafa ákveðið að kljúfa sig úr Borgarahreyfingunni og stofna nýtt stjórnmálaafl, Hreyfinguna. Þetta kom fram á blaðamannafundi á Thorvaldsen í dag. Nýju stjórnmálahreyfingunni er ætlað að fylgja upprunalegri stefnuskrá Borgarahreyfingarinnar og veita grasrótarhreyfingum rödd á Alþingi.

Borgarareyfingin fékk fjóra þingmenn kjörna í kosningunum í vor en undanfarna mánuði hefur hart verið tekist á innan hreyfingarinnar um menn og málefni.

Þráinn Bertelsson sagði skilið við hreyfinguna í sumar í kjölfar átaka innan þingflokksins um afstöðu til Evrópumála og tölvupósts sem Margrét sendi þar sem hún velti fyrir sér hvort Þráinn væri með alzheimer á byrjunarstigi.