„Erfitt að rökræða við fólk sem er fjarverandi"

Birgir Ármannsson, þingmaður Sjálfstæðisflokksins, segir að í umræðum um frumvarp ríkisstjórnarinnar um Icesave í gærkvöldi hafi stjórnarliðar verði meira og minna fjarverandi. „Það er erfitt að rökræða við fólk sem er fjarverandi. Það segir sjálft. Tilgangur umræðu í þinginu eru rökræður, ekki einræður," segir Birgir.

Frumvarp ríkisstjórnarinnar um ríkisábyrgð vegna Icesave reikninga Landsbankans kom til annarrar umræðu á Alþingi í gær og ræddu þingmenn um frumvarpið fram á kvöld. Þingmenn Sjálfstæðisflokks og Framsóknarflokks ræddu um fundarstjórn forseta Alþingis í meira en 20 mínútur á þingfundi á tólfta tímanum. Þingmennirnir gerðu alvarlegar athugasemdir við fjarveru ráðherra og stjórnarliða og á þá einkum Jóhönnu Sigurðardóttur, forsætisráðherra.

„Lengst af var fjármálaráðherra viðstaddur og allt gott um það segja en þegar leið á kvöldið hvarf hann af vettvangi. Aðrir ráðherrar sáust ekki," segir Birgir.

Þingmaðurinn bendir á um sé að ræða mál sem forystumenn ríkisstjórnarinnar hafi sagt að sé gríðarlega mikilvægt. „Forsætisráðherra hefur sjálf lýst því yfir að þetta sé eitthvað stærsta og mikilvægasta mál sem við erum að glíma við um þessar mundir."

Birgir segir að stjórnarandstaðan hafi talið það þjóna umræðunni betur ef ráðherrar og stjórnarliðar væru viðstaddir umræðuna. „Bæði þannig að þeir heyrðu okkar sjónarmið og eins líka vegna þess að við höfðum í huga að spyrja þá ýmissa spurninga varðandi málið og forsögu þess."