Tveimur frönskum karlmönnum vísað frá landinu

Lögreglan á Suðurnesjum og Útlendingastofnun vísuðu í dag tveimur frönskum karlmönnum frá landinu.

Við afskipti lögreglu vaknaði grunur um að þeir væru hingað komnir í ólögmætum tilgangi. Í fórum mannanna fannst svo búnaður sem ætlaður er til að svíkja fé af fólki með blekkingum og fölsun Evruseðla. Sams konar búnaður hefur áður verið tekinn af mönnum sem hingað hafa komið í sama tilgangi.

Við ákvörðun Útlendingastofnunar var litið til frávísunarheimilda í útlendingalögum þar sem skírskotað er til allsherjarreglu og almannaöryggis. Mennirnir komu til landsins að kvöldi þriðjudagsins 10. nóvember frá London Heathrow.