Bednar má æfa á ný

Roman Bednar má byrja að æfa og spila aftur með liði sínu, WBA, eftir að hafa tekið út bann í kjölfar þess að honum var gefið að sök að hafa keypt eiturlyf.

Enska götublaðið News of the World sýndi myndir frá eiturlyfjakaupum Bednar í vor og ákvað félagið umsvifalaust að setja Bednar út í kuldann. Síðar dæmdi enska knattspyrnusambandið hann í þriggja mánaða bann.

Bednar var gefið í sök að hafa keypt bæði kókaín og kannabis og fékk hann ávítur frá lögreglunni fyrir að hafa verið með lítið magn af þessum eiturlyfjum í sinni eign. Bednar hefur játað sök í þessu máli.

Bednar er Tékki og kom til félagsins í júní í fyrra frá Hearts í Skotlandi eftir að hafa verið í láni hjá félaginu. Á lánstímabilinu skoraði hann sautján mörk í 22 leikjum er WBA vann sér sæti í ensku úrvalsdeildinni en á síðasta tímabili var hann í byrjunarliðinu í aðeins tólf skipti og WBA féll aftur í B-deildina.