Rio orðaður við spænsku risana

Rio Ferdinand er í dag orðaður við bæði Real Madrid og Barcelona í enskum fjölmiðlum.

Ferdinand er á mála hjá Manchester United og samningsbundinn félaginu til loka ársins 2013.

Enskir fjölmiðlar gefa í skyn að Ferdinand hafi mikinn áhuga á að fara til Spánar í þeim að kynna sig á stærri markaði. Ferdinand hefur verið duglegur að koma sér á framfæri og gefur til að mynda út tímarit á netinu sem heitir #5. Hann rekur einnig tónlistarútgáfu og umboðsskrifstofu fyrir knattspyrnumenn.

Til að mynda hafa David Beckham og Cristiano Ronaldo hagnast mjög á því að fara frá Manchester United til Real Madrid og Ferdinand er sagður vel meðvitaður um þá staðreynd.

Ferdinand er þrítugur og gæti einnig freistast til að leita nýrra áskoranna áður en ferlinum lýkur, segir í frétt The Sun um málið.