Jón Gerald: Dapurleg endalok Baugs

„Mín fyrstu viðbrögð eru að það er mjög dapurt að þetta skuli enda svona," segir Jón Gerald Sullenberger athafnamaður, um úrskurð Héraðsdóms Reykjavíkur þar sem Baugi var synjað um áframhaldandi greiðslustöðvun. Jóni þykir örlög Baugs sorgleg, þá sérstaklega í ljósi þess að þeir fóru vel af stað í upphafi að hans mati.

„En einhvernveginn fóru þeir út af brautinni og misstu sig í græðginni," segir Jón Gerald sem sjálfur er mikill örlagavaldur hjá Baugi en uppruna Baugsmálsins svokallaða mátti rekja til hans og varð að dómsmáli þar sem Jón Ásgeir var að lokum dæmdur fyrir skattsvik. Þá heldur Jón Gerald einnig úti heimasíðunni baugsmalid.is.

Jón segir að fylleriíð sé búið, endalaok Baugs hafi verið dramatísk, nú þurfi að snúa sér að uppbyggingu nýs samfélags.

„Þetta er frekar ákveðin staðfesting á því sem ég hef lengi haldið fram," svarar Jón Gerald þegar hann er spurður hvort hann upplifi endalok Baugs sem nokkurskonar sigur eftir að hafa barist lengi gegn viðskiptaveldinu.

Sjálfur er Jón Gerald að fara opna lágvöruverslun eins og hann tilkynnti í Silfri Egils á síðasta ári. Aðspurður segir hann vonir standi til að fyrsta búðin verði opnuð í Kópavogi innann fárra mánaða. Enn sé þó nokkur vinna eftir, hann segir að kynningafundur fyrir hugsanlega hluthafa verði haldinn á morgun.

„Ef allt gengur eftir, þá sprettur ný lágvöruverslun fram," segir hann að lokum.