Ofurlaun þrátt fyrir nauðasamning Stoða

Jón Sigurðsson, fyrrum forstjóri Stoða sem áður hét FL Group, er enn á ofurlaunum hjá félaginu þótt það hafi komist í þrot fyrr á árinu og sé nú í meirihlutaeigu ríkisfyrirtækja.

Eiríkur Elís Þorláksson hæstaréttarlögmaður, sem er formaður nýrrar stjórnar Stoða, sagðist í gær ekkert vilja segja að svo stöddu um launakjör Jóns sem nú gegnir starfi framkvæmdastjóra hjá Stoðum í höndum nýju eigendanna.

Ekki náðist í Jón sjálfan í gær. Samkvæmt öðrum heimildum Fréttablaðsins er unnið að því að semja upp á nýtt við Jón um starfskjörin og þá á allt öðrum og lágstemmdari nótum en í samningi Jóns við fyrri eigendur.

Samkvæmt tekjublaði Mannlífs námu tekjur Jóns Sigurðssonar 9,4 milljónum króna á mánuði í fyrra. Það eru um það bil tíu sinnum hærri laun en forsætisráðherra hefur um þessar mundir. Eins og kunnugt er hafa ríkisstjórnarflokkarnir þá stefnu að enginn starfsmaður stofnana og félaga í meirihlutaeigu ríkisins hafi hærri laun en forsætisráðherrans.

Nauðasamningar Stoða við kröfuhafa félagsins voru staðfestir í Héraðsdómi Reykjavíkur um miðjan júní í sumar. Félagið óskaði eftir greiðslustöðvun um leið og ríkið tók yfir Glitni í lok september í fyrra. Stoðir áttu 32 prósenta hlut í Glitni.

Nauðasamningarnir fólu í sér að hlutafé fyrri eigenda Stoða var afskrifað og eignuðust gamli Glitnir um þriðjungshlut og NBI - eða Nýi-Landsbankinn - um fjórðungshlut í Stoðum.

Þegar Stoðir fengu heimild til að leita nauðasamninga í apríl námu skuldir félagsins um 280 milljörðum króna en eignir um 80 milljörðum. Helstu eignir Stoða í dag eru Tryggingamiðstöðin og stór hluti í evrópska drykkjavörurisanum Refresco sem er með höfuðstöðvar í Hollandi. - gar