Danielle krækti í þriðja Spursarann

Breska fyrirsætan Danielle Lloyd hlýtur að vera harðasti aðdáandi Tottenham í heimi. Hún er nú að rugla saman reitum við þriðja leikmannin úr röðum liðsins á nokkrum árum.

Danielle hefur áður átt vingott við framherjana Teddy Sheringham og Jermaine Defoe. Sheringham lék með Tottenham á árum áður og Defoe er kominn aftur í herbúðir liðsins eftir stutt stopp á suðurströndinni þar sem hann lék með Portsmouth.

Nú er Danielle hætt í framherjunum og farin að hitta miðjumanninn unga Jamie O´Hara, en bresku slúðurblöðin hafa náð nokkrum myndum af parinu eiga rómantískar stundir í London.

O´Hara er 22 ára gamall og hefur verið að vinna sig hægt og bítandi inn í lið Tottenham. Hann á að baki landsleiki með U-21 árs liði Englendinga.

Ævisaga Danielle kemur út fljótlega þar sem hún segir frá ævintýrum sínum sem fyrirsæta og kærasta knattspyrnumanna og sagan segir að einhverjir af þeim herramönnum sem hún hefur verið að hitta séu með í maganum yfir útkomunni.