Logi: KR ekki þekkt fyrir að vinna í Eyjum

Logi Ólafsson, þjálfari KR, var að vonum ánægður eftir leikinn og sigurinn vera sætan.

„Þetta var mjög sætt ekki síst vegna þess að KR hefur nú ekki verið þekkt fyrir að koma til Eyja og vinna fótboltaleiki. Við vissum það að þetta yrði mjög erfitt, myndi snúast um það að halda markinu hreinu og standa uppi sem sigurvegari í þessari baráttu sem er inn á vellinum. Við þurftum að berjast eins og grenjandi ljón og við vorum tilbúnir í það."

Loga fannst fátt koma sér á óvart í leik Eyjamanna en var samt hissa á því hvað þeir pressuðu framarlega. „Það kom mér mjög óvart hvað þeir pressuðu okkur framarlega því lið sem er komið svona upp að vegg eins og þeir eru þau vilja nú oftar en ekki fara í þessa baráttu svona hægt og bítandi og spila upp á jafntefli. Það gerðu Eyjamenn ekki í dag og þeim ber að hrósa fyrir það."

KR-ingar fá FH í heimsókn í næstu umferð en það verður væntanlega einn af leikjum tímabilsins en hvernig líst Loga á viðureignina. „Það verður erfiður leikur. FH er sennilega með besta liðið á landinu og við höfum ekki verið að ná neinum glimrandi úrslitum á móti þeim síðustu ár en ef við komum rétt stefndir getum við kannski veit þeim einhverja keppni."