Samningar að nást um raforkusölu frá Búðarhálsi

Oddvitar ríkisstjórnarinnar lýstu því yfir í gær að samstaða væri um það að ráðast í virkjun Tungnaár við Búðarháls. Friðrik Sophusson fagnar þessari stuðningsyfirlýsingu ríkisstjórnainnar, sem hann telur mjög mikilvæga.

En fyrst þarf að tryggja sölu raforkunnar. Samningar við Alcan í Straumsvík eru á lokastigi þessa dagana, segir Friðrik, og vonast til að ljúka þeim. Þá er eftir sá vandi að tryggja fjármagn til framkvæmdanna, sem raunar byrjuðu fyrir átta árum. Viðræður eru þegar hafnar við íslenska lífeyrissjóði en fleira þarf til. Nefnt hefur verið að Alcan eða aðrir erlendir aðilar komi að virkjuninni.

Hvort annarskonar eignarhald á virkjunni þurfi að koma til svarar Friðrik að allt komi til greina. "Ég tel að það sé svo mikilvægt að koma atvinnulífinu og efnahagslífinu af stað að við eigum að skoða allt. Allar óhefðbundnar leiðir, skoða allt, því það er svo mikið í húfi," segir hann.

Búðarháls er það verkefni á lista stjórnvalda sem flest störf gæti skapað og sjá margir því fyrir sér að stórframkvæmdir þar gætu markað upphaf endurreisnarinnar. Friðrik telur að framkvæmdir gætu hafist næstu sumar en fyrst þurfi að bjóða út verkið. Hann segir reiknað með því að hægt verði að svara kaupanda orkunnar í kringum áramót hvort Landsvirkjun nái að fjármagna verkið.