Ný þjófafæla er nú fáanleg

„Þjófafælurnar eru farnar að tínast út,“ segir Haukur Hannesson, framkvæmdastjóri verslunarinnar Glóeyjar sem selur nú nýtt tæki í baráttunni við innbrotsþjófa. Þetta er svokölluð FakeTV þjófafæla, sem gefur frá sér sams konar flöktandi birtu og sjónvarpstæki.

Verslunin hóf sölu á þjófafælunum fyrir um það bil hálfum mánuði. Tilgangur þeirra er að fá innbrotsþjófa til að halda að einhver sé heima að horfa á sjónvarpið og fæla þá þannig frá frekari aðgerðum. Að sögn Hauks er þjófafælan hugsuð sem viðbót við aðrar ráðstafanir til að draga úr hættu á innbrotum.

„Þegar fólk er að heiman er mikilvægt að láta líta út sem einhver sé heima, meðal annars með því að nota tímarofa til að kveikja og slökkva á ljósum,“ segir hann. „Þjófafælan bætir svo um betur og gefur til kynna að einhver sé heima að horfa á sjónvarpið. Áhersla er lögð á að tækið sjálft sjáist ekki utan frá, heldur aðeins sjónvarpsglampinn sem frá því kemur.“

Þjófafælan er með birtuskynjara, sem kveikir sjálfkrafa á tækinu þegar dimmir. Einnig má stilla hana með tímarofa.

- jss