Fulham upp í 8. sætið

Fulham vann góðan 1-3 sigur á Manchester City á útivelli í dag. Clint Dempsey skoraði tvö marka Fulham sem átti sigurinn skilinn gegn slöku liði City.

Fulham byrjaði betur en City náði forystunni í daufum fyrri hálfleik. Stephen Ireland skoraði þá með skoti sem fór í varnarmann og í fjærhornið. Staðan í hálfleik var 1-0.

En þrjú varnarmistök hjá City gerðu útslagið. Clint Dempsey jafnaði eftir að City missti boltann klaufalega á miðjunni, Bobby Zamora braut fram og boltinn barst til Dempsey sem skoraði.

Þetta var fyrsta markið sem Shay Given fékk á sig á heimavelli frá því að hann gekk í raðir City í janúar.

Dickson Etuhu kom Fulham yfir með góðu skoti í vinkilinn eftir að City mistókst að hreinsa, en hann var að spila gegn sínum gömlu félögum í dag.

Dempsey skoraði svo aftur eftir skyndisókn sem kom í kjölfar mistaka hjá City.

Fulham er þar með komið upp í áttunda sæti deildarinnar á meðan City situr í því ellefta.