Líklegast að Tinna muni sitja áfram

Þær Tinna Gunnlaugsdóttir, sitjandi þjóðleikhússtjóri, og Þórhildur Þorleifsdóttir voru, af þjóðleikhúsráði, metnar hæfastar til að gegna starfi þjóðleikhússtjóra, samkvæmt heimildum Fréttablaðsins.

Auk þeirra sóttu þau Ari Matthíasson, Hilmar Jónsson, Hlín Agnarsdóttir, Kolbrún Halldórsdóttir, Magnús Ragnarsson, Páll Baldvin Baldvinsson og Sigurður Kaiser um stöðuna. Allir umsækjendur voru metnir hæfir, en þær Tinna og Þórhildur hæfastar.

Þetta eykur líkurnar á því að Tinna Gunnlaugsdóttir sitji áfram sem þjóðleikhússtjóri. Samkvæmt heimildum Fréttablaðsins er ólíklegt að menntamálaráðherra gangi fram hjá sitjandi stjórnanda sem metinn er hæfastur, nema viðkomandi hafi brotið af sér í starfi. Svo er ekki með Tinnu.

Þá hefur blaðið heimildir fyrir því að í menntamálaráðuneytinu sé unnið að nýjum lögum um Þjóðleikhúsið. Samkvæmt þeim verði ráðningartímabil þjóðleikhússtjóra fjögur ár, en ekki fimm eins og nú er. Þá verði það sett í lög að leikhússtjóri sitji ekki lengur en tvö kjörtímabil.

Þjóðleikhúsráð mun hafa lagt þessar breytingar til og er líklegt að frumvarpið líti dagsins ljós á nýju þingi í október.

- kóp