Davíð Þór: Vorum algjörir klaufar að klára þetta ekki

Davíð Þór Viðarsson, fyrirliði FH, átti fínan leik á miðjunni í dag og kom FH-liðinu í gang á ný þegar hann jafnaði leikinn með skalla eftir hornspyrnu Tryggva Guðmundssonar.

„Mér fannst við vera miklu sterkara lið í þessum leik en það er víst ekki nóg í fótbolta til að fá þrjú stig. Maður verður að nýta færin sín og skora fleiri mörk en andstæðingurinn sem við gerðum ekki í þessum leik," segir Davíð Þór.

„Ég veit ekki hversu mörg færi við áttum í þessum leik. Við erum 1-0 undir í hálfleik en fáum allavega fimm til sex mjög góð færi í fyrri hálfleik," sagði Davíð sem var svekktur með jöfnunarmark Keflavíkurliðsins.

„Við misstum boltann á miðjunni og þeir fara upp í ágætis upphlaup og skora. Þetta er algjört kæruleysi hjá okkur því við eigum að vera með það reynslumikið lið að vita að við eigum bara að negla boltanum fram í þessari stöðu," segir Davíð.

Davíð Þór tók ekki vítið sem FH fékk í stöðunni 2-1 heldur Matthías Vilhjálmsson sem lét markvörð Keflavíkur verja frá sér. „Það kom alveg til greina að ég tæki vítið. Það er annaðhvort ég eða Matti sem tökum vítin þegar Tryggvi er ekki inn á vellinum. Matti vildi bara taka það en hann var óheppinn því hann er góð vítaskytta. Þetta getur gerst í þessum bransa," segir Davíð.

FH-liðið átti í nokkrum vandræðum með Færeyinginn Símun Samuelsen og Davíð viðurkennir það. „Símun er góður leikmaður. Hann er duglegur að finna sér pláss inn á miðjunni milli varnar og miðju og það var erfitt að ráða við hann. Hann var góður í þessum leik og Keflavík er með mjög gott lið en við vorum samt algjörir klaufar að klára þetta ekki í dag," segir Davíð en það er engin ástæða til að örvænta enda er staða liðsins mjög góð í Pepsi-deildinni þar sem liðið er með þrettán stiga forustu á næsta lið.

„Við erum í fínni stöðu en viljum hvern einasta leik sem við förum í. Núna erum við án sigurs í tveimur leikjum í röð og við erum hvorki vanir því eða ánægðir með það," sagði Davíð að lokum.