Le Havre sendi inn kvörtun vegna United

Franska knattspyrnufélagið Le Havre hefur nú sent inn formlega kvörtun til Alþjóða knattspyrnusambandsins, FIFA, vegna Manchester United.

Le Havre sakar nú United um að hafa brotið reglur þegar að félagið samdi við táninginn Paul Pogba sem er uppalinn hjá Le Havre.

Franska félagið sakar United um að hafa beitt Pogba þrýstingi um að rifta samningi sínum við Le Havre og ganga svo til liðs við United.

Málið er keimlíkt því þegar að Lens kvartaði undan Chelsea fyrir að „stela" öðrum táningi, Gael Kakuta. Í vikunni úrskurðaði FIFA að Chelsea væri bannað að kaupa nýja leikmenn til félagsins fyrr en í janúar árið 2011.

Forráðamenn Le Havre hrósuðu mjög FIFA fyrir þetta og vonast nú til að United verði refsað á svipaðan máta.

„Manchester United hafði samband við foreldra drengsins og bauð þeim himinháar fjárhæðir, sér í lagi fyrir fimmtán ára dreng," sagði Jean-Pierre Louvel í samtali við franska fjölmiðla.