Stóraukin ásókn er í byssu- og veiðileyfi

Metaðsókn hefur verið á námskeið Umhverfisstofnunar í meðferð skotvopna og vegna umsókna um veiðikort á þessu ári. Fjölgun frá síðasta ári nemur um fimmtíu prósentum, að sögn Einars Guðmann, sérfræðings stofnunarinnar sem heldur utan um námskeiðin. Síðasta námskeið þessa árs var haldið 12. nóvember.

„Það er aukin ásókn í bæði skotvopna- og veiðikortaleyfi,“ segir Einar og bætir við að þótt á síðasta ári hafi mátt merkja nokkuð aukna aðsókn á námskeiðin sé aukning á þessu ári umtalsverð. Til þess að fá skotvopnaleyfi og/eða veiðileyfi þarf fólk að sitja námskeið og standast próf úr því hjá Umhverfis­stofnun.

Á höfuðborgarsvæðinu hafa í tvígang á þessu ári verið yfir 100 manns á námskeiði stofnunarinnar, en Einar segir kjörfjölda á námskeið vera nær fimmtíu manns.

„Ég held að flestir hafi orðið 110 á einu námskeiði hjá okkur,“ segir hann og áréttar um leið að aukningin sé á landsvísu, ekki höfuðborgarsvæðinu einu. „Á þessu ári erum við búin að halda 57 námskeið í sextán bæjarfélögum.“

Einar segir hins vegar ekki gott að segja hvað valdi þessari aukningu. „Getgátur eru hins vegar um að núna komi eldri menn í auknum mæli á námskeiðin. Áður fyrr voru þetta meira og minna strákar og stelpur nær tvítugu.“ Nú virðist hins vegar meira um að menn sem jafnvel hafi haft skotvopnaleyfi í mörg ár séu að verða sér úti um réttindi.

„Þetta er í sjálfu sér mjög jákvætt og vísbendingar um að menn séu að gera sig löglega. En hvort það er vegna tíðra frétta af því að lögreglan grípi menn fyrir skammarstrik gegn veiðilöggjöfinni er erfið­ara um að segja. Ég held raunar að þetta séu samverkandi áhrif margra þátta,“ segir hann og nefnir að auk fregna af auknu eftir­liti með veiðum hafi verið fjallað meira um veiði, sem veki áhuga. Þá hafi verið gerðar breytingar á rjúpnaveiðitímabilinu, sem nú standi fram í desember.

„Það verður til þess að eftirspurn eftir námskeiðum varir óvenju lengi.“ Annar þáttur sé svo að tekið hafi verið upp rafrænt skráningarform á námskeið stofnunarinnar á vefnum veiðikort.is.

Þá segir Einar að merkja megi að veiðimönnum fjölgi. „Á hverju ári hættir stór hópur veiðum sökum aldurs og fram að þessu ári hafa námskeiðin ekki gert annað en að halda í við fækkunina sem orðið hefur.“

Núna segir hann að um tólf þúsund manns séu í hópi þeirra sem endurnýi veiðikort sín árlega, en fjöldinn hafi verið undir ellefu þúsundum síðustu ár.

olikr@frettabladid.is