Grétar Sigfinnur: Áttum ekki að fá á okkur mark

Grétar Sigfinnur Sigurðarson fyrirliði KR hefur leikið þrjá Evrópuleiki á ferlinum og skorað í þeim tvö mörk en vildi lítið dvelja við það enda ósáttur við að landa ekki sigri gegn Basel í kvöld.

"Það er skemmtilegt að skora en ég hefði viljað klára þennan leik. Frábær fyrri hálfleik og í seinni hálfleik kemur í ljós að við erum að leika gegn frábæru liði sem erfitt er að verjast á móti en þeir refsa þegar menn gera mistök og við gerum tvö mistök," sagði Grétar.

"Leikaðferðin gekk upp en einstaklingsmistök kosta okkur tvö mörk eins og hjá mér í síðara markinu. Maður á að vera reyndari en það að reyna að komast fram fyrir menn og þá kann hann þetta [Alexander Frei] og heldur mér."

Það útheimtir mikla orku að leika varnarleikinn aftarlega líkt og KR gerði og láta andsætínginn um að stjórna leiknum á boltanum. "Auðvitað vorum við þreyttir en það skiptir engu máli. Við fáum auka orku við að spila svona leiki. Við höfum gert þetta í þessari keppni og það hefur gengið vel. Við spiluðum oft vel út úr þessu þó við höfum misst boltann heldur oft í seinni hálfleik en þetta er lið sem var í Meistaradeildinni í fyrra."

"Það vantaði herslumuninn að setja fleiri og halda hreinu, við áttum ekki að fá okkur mark í þessum leik. Þeir voru ekki að spila sig í gegnum okkur. Við héldum þeim alltaf en það voru þessi tvö mistök sem þeir nýttu sér, þeir kunna það."

Grétar segir uppleggið í Sviss vera einfalt. "Það er sigur og ekkert annað. Við förum ekki út á fótboltavöll með annað í huga en að reyna að sigra. Við ætlum að skora og vera þéttir. Það er sama tuggan eins og alltaf," sagði Grétar að lokum.