Fabregas: Við ætlum ekki að tapa fleiri leikjum á tímabilinu

Cesc Fabregas hefur átt flotta innkomu í lið Arsenal síðan hann kom aftur eftir fjögurra mánaða fjarveru vegna hnémeiðsla. Fabregas tók við fyrirliðabandinu á ný þegar hann snéri aftur eftir meiðslin en Arsenal hefur ekki tapað leik með hann sem fyrirliða.

„Þetta er mjög gott hjá okkur en þetta er ekki nóg. Við viljum fara alla leið," sagði Fabregas . „Við höfum sett okkur það markmið að tapa ekki fleiri leikjum á tímabilinu. Það er samt ekkert öruggt að við náum að fylgja því markmiði," sagði Fabregas í viðtali við SkySports.

„Við höfum náð að fara taplausir í gegnum síðustu vikur og ætlum að reyna að halda því áfram í nokkrar vikur til viðbótar," sagði Fabregas sem er spenntur fyrir framhaldinu.

„Nú bíða okkur góðir tíu dagar þar sem við spilum þrjá mjög mikilvæga leiki. Þessir leikir munu ráða því hvernig tímabilið endar og hversu langt við komust," sagði Fabregas en Arsenal á enn möguleika á að vinna Meistaradeildina og enska bikarinn. Vonin um að vinna deildina er þó nánast orðin að engu.

„Ég hef mikla trú á liðinu og ef að við spilum eins og við höfum verið að gera að undanförnu þá getum við náð langt," sagði Fabregas.