Clichy kemur ekki meira við sögu hjá Arsenal

Franski bakvörðurinn Gael Clichy hjá Arsenal getur ekki leikið meira með liði sínu það sem eftir lifir leiktíðar vegna bakmeiðsla.

Clichy hefur verið frá keppni í mánuð vegna meiðsla sinna og Arsene Wenger knattspyrnustjóri segir útilokað að hann spili meira.

"Hann er úr leik. Við hefðum kannski sett pressu á að koma honum í gagnið ef við hefðum náð í úrslitaleikinn í meistaradeildinni en við tökum ekki þá áhættu úr þessu," sagði Arsene Wenger í samtali við Setanta í dag.

Hann upplýsti einnig að Rússinn Andrei Arshavin væri með flensu, en hann er eini maðurinn sem er tæpur fyrir leikinn gegn Chelsea í deildinni um helgina.

"Arshavin var með flensu svo við sendum hann heim, en ég hugsa að verði í lagi með hann um helgina," sagði Wenger.