Eigendur smábáta segjast hraktir burt

Eigendur smábáta í Reykjavík óttast að nýtt skipulag fyrir Reykjavíkurhöfn geri ekki ráð fyrir starfsemi þeirra. Þeir segjast hafa verið beittir þrýstingi um að færa alla starfsemi sína úr Grófinni yfir á Granda. Aðalfundur Smábátafélags Reykjavíkur, sem haldinn var á mánudag, lýsti yfir megnri óánægju með áhugaleysi borgaryfirvalda um sterka smábátaútgerð í borginni.

Garðar Berg Guðjónsson, formaður félagsins, segir smábátaeigendur óttast að þeim verði ýtt í burtu og gert erfiðara um vik að stunda útgerð í Reykjavík. Hann segir þá hafa fengið það viðmót að starfsemin sé ekki endilega æskileg. „Við höfum lent í vandræðum með geymslupláss yfir vetrartímann og verið bent á að fara upp á Akranes, þar sé nóg pláss.“

Faxaflóahafnir standa fyrir hugmyndasamkeppni um gömlu höfnina. Garðar segir ekki annað hægt að lesa úr samkeppninni en þrengja eigi enn að smábátum. „Reykjavík er stærsta verstöð landsins og okkur finnst að verið sé að ýta okkur út á kostnað einhvers annars.“

Í fyrra lönduðu 67 bátar afla í Reykjavík sem tilheyra félaginu. Að auki voru eigendur sextíu annarra báta í félaginu, sem ekki lönduðu afla á síðasta ári. Garðar segir mun fleiri hafa landað afla í ár, eftir að strandveiðar voru gefnar frjálsar í sumar.

Skilafrestur í hugmyndasamkeppnina er 6. október og á niður­staða að vera ljós fyrir nóvemberlok. Júlíus Vífill Ingvarsson, borgarfulltrúi og stjórnarformaður Faxaflóahafna sf., er formaður dómnefndar. Hann segir að tryggt hafi verið í forskrift samkeppninnar að sú starfsemi sem nú er í höfninni fái að haldast þar. Höfnin sé vinnuhöfn en ekki montbátahöfn og þannig vilji menn halda því.

Júlíus Vífill hvetur sem flesta til að taka þátt í samkeppninni, en almenningi gefst færi á að skila inn sínum hugmyndum, auk fagfólks.

Sigurtillagan verður innlegg í vinnu fyrir aðalskipulag Reykjavíkur sem gilda mun til 2030, með framtíðarsýn til ársins 2050. Júlíus Vífill segir borgaryfirvöld munu halda opna kynningarfundi þegar skipulagið er komið á það stig.kolbeinn@frettabladid.is