Zola: Tottenham er eitt af sex bestu liðunum

Gianfranco Zola var að venju æðrulaus eftir að hans menn í West Ham máttu sætta sig við 1-0 tap fyrir grönnum sínum í Tottenham í dag.

Sigur Tottenham þýðir að liðið er nú komið í áttunda sæti deildarinnar og ekki er útlokað að það eigi von á sæti í Evrópukeppni eftir að hafa verið á botni deildarinnar lengi framan af vetri.

West Ham er þremur stigum á undan Tottenham í töflunni, situr í sjöunda sæti með 44 stig á meðan Tottenham er í áttunda með 41 stig þegar sex umferðir eru eftir.

"Við erum enn þremur stigum á undan Tottenham og við reynum að verja það forskot eins og við getum. Það væri leiðinlegt ef strákarnir næðu ekki að landa sætinu, því þeir hafa lagt hart að sér," sagði Zola og hrósaði mótherjum sínum.

"Tottenham er eitt af sex bestu liðum Englands og við spiluðum óttalaust og stóðum í þeim. Við hefðum auðveldlega geta hirti stig í þessum leik. Ég get bara hrósað strákunum mínum," sagði Zola.

Harry Redknapp, stjóri Tottenham, viðurkenndi í fyrsta skipti að lið hans væri nú laust úr fallbaráttu eftir eina verstu byrjun í sögu félagsins.

"Maður er aldrei öruggur og ég sagði fyrir leikinn að ég vildi ná í einn sigur í viðbót til að vera viss. Nú er hann kominn og það er ekki hægt annað en að vera ánægður með stöðu mála," sagði Redknapp og minnti enn eina ferðina á það hver staðan var þegar hann tók við liðinu í haust.

"Við vorum jarðaðir á botninum með tvö stig eftir átta leiki og mig hefði aldrei dreymt um að eiga möguleika á Evrópusæti á þessari leiktíð," sagði Redknapp.