Íslensk áhöfn neyddist til að múta rússnesku strandgæslunni

Áhöfnin á togaranum Málmey frá Sauðárkróki neyddist til að múta rússneskum strandgæslumönnum til að komast út úr rússneskri landhelgi fyrr í mánuðinum.

Togarinn Málmey frá Sauðárkróki kom til hafnar á miðvikudaginn eftir 44 daga túr þar sem meðal annars var veitt í norskri og rússneskri lögsögu. Í rússnesku lögsögunni var Málmey á þorskveiðum og gekk vel . Að veiðum loknum átti Málmey stefnumót við rússnesku strandgæsluna sem venju samkvæmt þarf að yfirfara afla, veiðarfæri og annað.

Fundur skipverjanna á Málmey og rússnesku embættismannanna var hins vegar óvenjulegur. Þeir sýndu afla og veiðarfærum lítin áhuga en þeim mun áhugasamari um ýmsan varning um borð.

Rússarnir heimtuðu gosdrykki, sælgæti, vinnufatnað og fleira af skipverjunum á Málmey og gerðu þeim grein fyrir því að vesen hlytist af skipverjarnir yrðu með múður.

Varningurinn sem rússnesku strandgæslumennirnir höfðu af skipverjunum á Málmey er metin á allt að eitthundrað þúsund krónur.