Tólf hundruð fóru með strætó

Rúmlega tólf hundruð farþegar nýttu sér strætóferðir milli Sandgerðis, Garðs og Reykjanesbæjar í október, að því er fram kemur á vef Víkurfrétta. Byrjað var að bjóða upp á slíkar ferðir í byrjun október.

Um er að ræða samstarfsverkefni milli Sandgerðisbæjar, Garðs, SBK og Hópferða Sævars um að auka tíðni strætóferða á milli þessara byggðarlaga. Um tilraunaverkefni er að ræða sem verður endurskoðað um áramótin með tilliti til nýtingar. Strætisvagnaferðirnar eru fríar en boðið er upp á 53 ferðir í hverri viku, að því er segir á vf.is.- kh