Gunnar Oddsson: Ég er þjálfari liðsins í dag

„Það er óbreytt ástand," sagði Gunnar Oddsson, þjálfari Þróttar, þegar Vísir náði í hann áðan og spurði út í stöðu mála. Gunnar sagði við fjölmiðla í gær að hann væri að íhuga sína framtíð hjá félaginu eftir tapleik gegn KR.

Þegar blaðamaður spurði Gunnar að því hvort hann byggist þá við því að vera áfram með liðið svaraði hann: „Það sagði ég ekki. En ég er þjálfari liðsins í dag og það er það eina sem maður getur sagt á þessari stundu," sagði Gunnar.

Stjórn Þróttar hélt fund fyrr í dag en þar var Gunnar ekki viðstaddur. „Næsta skref hjá mér er bara æfing. Það er hefðbundin æfing daginn eftir leik," sagði Gunnar sem sagði að tíminn þyrfti að leiða í ljós hvort staða mála myndi breytast.

Það eru því miklar líkur á því að Gunnar Oddsson sé að fara að stýra sinni síðustu æfingu með Þrótti í kvöld. Næsti leikur Þróttar er miðvikudaginn 5. ágúst gegn Fjölni.