Umfjöllun: Góður Fylkissigur í Dalnum

Fylkir sigraði Þrótt 2-1 í Laugardalnum og voru öll mörkin skoruð í síðari hálfleik.

Fyrri hálfleikur leiksins var afar tíðindalítill og fer seint í sögubækurnar fyrir skemmtanagildi. Mikil barátta einkenndi hálfleikinn og voru bæði lið varfærin í öllum sínum aðgerðum. Þá voru Þróttarar sérstaklega rólegir í tíðinni. Þeir lágu afar aftarlega á vellinum og stilltu upp einum framherja, Morten Smidt. Hann virtist ævinlega í einskis manns landi og áttu traustir hafsentar Fylkismanna ekki í neinum vandræðum með sóknartilburði heimamanna sem voru af skornum skammti.

Fylkismenn voru mun líklegri í hálfleiknum og voru þeir Ingimundur Níels Óskarsson og Albert Brynjar Ingason hvað sprækastir gestanna í fyrri hálfleiknum. Ekkert almennilegt færi leit hins vegar dagsins ljós í fyrri hálfleik og fátt var um fína drætti spilalega séð hjá báðum liðum.

Svo virðist sem bæði lið hafi fengið hressilegt tiltal í hálfleik því það var allt annað að sjá til leikmanna í síðari hálfleik. Þróttarar voru sprækari fyrstu fimmtán mínútur síðari hálfleiks og voru líklegri til að skora.

Andrés Vilhjálmsson kom inn á í hálfleik hjá Þrótti fyrir meiddan Dennys Danry. Andrés átti fínt skot að marki á 52. mínútu sem Fjalar Þorgeirsson, markvörður Fylkis, varði vel í horn. Þetta skot var án vafa hættulegasta færi leiksins fram að þessu.

Það var svo talsvert gegn gangi leiksins þegar Fylkismenn komust yfir á 71. mínútu leiksins. Þá áttu Fylkismenn fína sókn sem endaði með því að Ingimundur Níels Óskarsson átti skot sem Henryk Forsberg varði, boltinn barst út í teiginn til Halldórs Arnars Hilmissonar sem skoraði með föstu skoti.

Spilamennska liðanna batnaði talsvert í síðari hálfleik og háloftaspyrnum fækkaði. Þróttarar reyndu hvað þeir gátu að jafna leikinn eftir að Fylkir komst yfir og var Magnús Már Lúðvíksson einna sprækastur í liði Þróttar sóknarlega séð. Á 76. mínútu áttu Þróttarar síðan fyrirgjöf frá vinstri sem hafnaði í stönginni á Fylkismarkinu.

Skömmu síðar, eða á 80. mínútu kom svo varamaðurinn, Jóhann Þórhallsson, Fylki í 0-2 með laglegu marki. Hann fékk sendingu frá Andrési Má Jóhannssyni, lék laglega á Henryk í markinu og sendi knöttinn í netið.

Þróttarar lögðu ekki árar í bát og á 83. mínútu fengu þeir hornspyrnu frá vinstri. Magnús Már Lúðvíksson tók spyrnuna og sendi á kollinn á varnarmanninum, Hauki Sigurðssyni, sem skallaði knöttinn laglega í fjærhornið.

Lengra komust Þróttarar hins vegar ekki þrátt fyrir mikinn vilja og þurftu þeir því að sætta sig við tap á heimavelli sínum fyrir sterkum Fylkismönnum.



Þróttur - Fylkir 1-2 (0-0)

0-1 Halldór Arnar Hilmisson '71

0-2 Jóhann Þórhallsson '80

1-2 Haukur Páll Sigurðsson '83

Valbjarnavöllur

Áhorfendur: óuppgefið (frekar fámennt)

Dómari: Örvar Snær Gíslason 5

Skot (á mark): 16 (5) - 10 (5)

Varin skot: Sindri 1, Henryk 2 Fjalar 4

Horn: 4-3

Aukaspyrnur fengnar: 19-15

Rangstöður: 2-4



Þróttur (4-5-1)

Sindri Snær Jensson 6

(46. Henryk Forsberg 4)

Ingvi Sveinsson 5

Kristján Ómar Björnsson 5

Haukur Páll Sigurðsson 6

Jón Ragnar Jónsson 4

Hallur Hallsson 5

Dennis Danry 5

(46. Andrés Vilhjálmsson 6)

Rafn Andri Haraldsson 5

Magnús Már Lúðvíksson 6

Davíð Þór Rúnarsson 4

Morten Smidt 3

(63. Hjörtur J. Hjartarson 5)

Fylkir 4-3-3:

Fjalar Þorgeirsson 6

Tómas Þorsteinsson 5

Kristján Valdimarsson 6

Ólafur Ingi Stígsson 7

Andrés Már Jóhannesson 6

Valur Fannar Gíslason 7 ML

Ásgeir Börkur Ásgeirsson 5

Halldór Arnar Hilmisson 7

Theodór Óskarsson 4

(45. Jóhann Þórhallsson 6)

Ingimundur Níels Óskarsson 6

(88. Felix Hjálmarsson)

Albert Brynjar Ingason 6

(54. Kjartan Andri Baldvinsson 5)

Leiknum var lýst beint á Boltavakt Vísis og Fréttablaðsins. Til að sjá lýsinguna er hægt að smella hér: Þróttur - Fylkir

Boltavaktina má einnig nálgast á Vodafone Live! farsímaþjónustunni.