Jamie Carragher hefur áhyggjur af uppkomu Manchester City

Jamie Carragher varnarmaður Liverpool hefur trú á því að Manchester City blandi sér í hóp fjögurra bestu liðanna í ensku úrvalsdeildinni á þessu tímabili. Carragher spáir því einnig að lið eins og Tottenham Hotspur, Everton og Aston Villa verði að berjast um Meistaradeildarsætin.

„Man City liðið lítur mjög vel út alveg eins og Tottenham. Aston Villa og Everton eru líka með í baráttunni og það stefnir í mjög spennandi tímabil í efri hlutanum. Það er langt frá því að vera öruggt hvaða lið endi í fjórum efstu sætunum," sagði Carragher.

„Manchester City er með marga frábæra leikmenn og ég er viss um að þeir munu líka kaupa nýja menn í janúarglugganum. Það er því mikil ógn í þeim," sagði Carragher.

„Við verðum líka að passa okkur á því að vera líka með í baráttunni," segir Carragher en Liverpool hefur "aðeins" náð í sex stig í fyrstu fjórum umferðunum og er sem stendur í 7. sæti.