Ferdinand farinn að æfa aftur með United - gæti spilað um helgina

Rio Ferdinand varnarmaðurinn öflugi hjá Manchester United er búinn að ná sér af meiðslunum sem hann varð fyrir daginn fyrir fyrsta leik í ensku úrvalsdeildinni. Ferdinand gæti verið klár fyrir næsta leik liðsins sem er á móti Tottenham á laugardaginn.

Það var búist við að Ferdinand yrði frá í að minnsta kosti mánuð en endurhæfingin hefur gengið mjög vel og hann er á undan áætlun.

„Rio er búinn að æfa með okkur í þessari viku og hann er vel á undan áætlun," sagði Sir Alex Ferguson, stjóri Manchester United sem sagði jafnframt að það kæmi vel til greina að nota hann á móti Tottenham.

„Ég er ekki viss um hversu miklar líkur eru á því að hann spili en það eru einhverjar líkur," sagði Sir Alex.

John O'Shea er meiddur á kálfa og verður ekki með á móti Tottenham en Gary Neville, Fabio da Silva og Wes Brown eru allir orðnir góðir af sínum meiðslum og tilbúnir í slaginn.