Portsmouth slapp naumlega við greiðslustöðvun

Peter Storrie, framkvæmdarstjóri Portsmouth, hefur greint enskum fjölmiðlum frá því að félagið var í raun hársbreidd frá því að fara í greiðslustöðvun.

Sulaiman Al Fahim keypti félagið í síðustu viku og kom því félaginu til bjargar. En það hefur þurft á undanförnu ári að selja marga af sínu sterkustu leikmönnum til að koma jafnvægi á bókhaldið.

Fáir leikmenn eru enn hjá félaginu af þeim sem voru í byrjunarliðinu í úrslitaleik ensku bikarkeppninnar vorið 2008.

„Við vorum mjög nálægt því nokkrum sinnum að fara í greiðslustöðvun," sagði Storrie. „Ég sjálfur var að berjast með kjafti og klóm að halda lífi í félaginu en það er ekki hægt að biðja endalaust um greiðslufresti."

„Stundum voru önnur knattspyrnufélög, skattayfirvöld og umboðsmenn knattspyrnumanna afar þolinmóðir og það til að gera mér persónulegan greiða."

„Þeir voru mjög skilningsríkir. En eftir smá tíma voru þeir eðlilega farnir að spyrja sig hvort þeir gætu leyft sér að halda áfram á sömu braut."

„Ég vil því þakka þessum aðilum kærlega fyrir aðstoðina því við erum nú í þeirri stöðu að geta leyft okkur að horfa til framtíðar."