Enn ein fléttan í bæjarstjórn Álftaness

Margrét Jónsdóttir, óháður bæjarfulltrúi á Álftanesi, og fulltrúar Á-listans, boðuðu til fundar á dögunum til að biðla til D-lista um samstarf. Ástæðan var að enn er óvissa um meirihlutasamstarf Á-lista þar sem ekki hefur tekist að ná samstöðu með Kristjáni Sveinbjörnssyni bæjarfulltrúa, samkvæmt heimildum Fréttablaðsins.

„Við erum að reyna að leita eftir víðtækara samráði og það eru búnar að vera þreifingar um að stokka upp í bæjarstjórninni,“ segir Sigurður Magnússon, bæjarstjóri Álftaness.

Óvissa um meirihlutann á Álftanesi hófst eftir að Kristján Sveinbjörnsson, sem sat fyrir Á-lista vildi koma úr fríi. Samflokksmenn hans töldu hann rúinn trausti vegna meiðyrðamáls og sögðu hann hafa tekið frí út kjörtímabilið.

Samgönguráðuneytið úrskurðaði í júlí að hann gæti setið áfram. Margrét Jónsdóttir, annar bæjarfulltrúi Á-lista, sagði sig úr Á-listanum skömmu síðar og starfa þau bæði sem óháðir fulltrúar.

Reyndu fulltrúar Á-lista að fara í samstarf við D-lista, sem hafnaði samstarfi. Eftir það reyndu bæjarfulltrúarnir sem kosnir voru fyrir Á-lista að endurnýja samstarfið.

Fyrsti bæjarstjórnarfundur er í september og segir Sigurður að æskilegt sé að lausn verði fundin á málinu á næstunni. Starfandi meirihluti eru þau fjögur sem kosin voru af Á-lista, þrátt fyrir að tveir séu óháðir.