Lögreglumenn sæti vopnaleit í Leifsstöð

Ósamræmi er milli þess sem flugmálastjórn segir um það hverjir eiga að vera undanþegnir öryggisleit í Leifsstöð og þess sem Keflavíkurflugvöllur ohf. segir vera sína starfsvenju.

Í Fréttablaðinu síðasta fimmtudag var haft eftir Friðþóri Eydal, fulltrúa hjá Keflavíkurflugvelli ohf., að meðal þeirra sem undanþegnir séu leit í öryggishliðum Leifsstöðvar séu tollverðir og lögreglumenn. Það sé í samræmi við fyrirmæli frá flugmálastjórn.

Þegar Fréttablaðið leitaði eftir því að fá skriflegan lista yfir þá sem eru undanþegnir öryggisleitinni reyndist ekki unnt að útvega slíkt skjal. Valdís Ásta Aðalsteinsdóttir, upplýsingafulltrúi flugmálastjórnar, segir hins vegar ljóst að hvorki lögreglumenn né tollverðir séu undanþegnir. „Það á að leita á þeim eins og öllum öðrum sem fara inn á svæðið.“ segir Valdís. Undanþegnir séu aðeins forsetinn, forsætisráðherrann og makar þeirra auk erlendra þjóðhöfðingja sem eru hér í opinberri heimsókn og sérstaklega sé tilkynnt um frá utanríkisráðuneytinu.

Friðþór Eydal segir hins vegar að um einhvern misskilning hljóti að vera að ræða hjá flugmálastjórn. Undanþágan fyrir tollverði og lögreglumenn sé stjórnvaldsaðgerð sem rúmist innan tilmæla frá Alþjóðaflugmálastofnuninni og samtökum flugmálastofnana í Evrópu. „Þetta eru menn sem starfs síns vegna þurfa að vera þarna. Þetta á til dæmis við um vopnaða lögreglu,“ fullyrðir Friðþór sem ítrekar þó að allir hefðbundnir starfsmenn í Leifsstöð, þar með talinn forstjórinn sjálfur, þurfi að sæta vopnaleit og geri það í sérstöku starfsmannahliði á fyrstu hæð.

Upplýsingafulltrúi flugmálastjórnar tekur ekki undir með Friðþóri varðandi tollverðina og lögreglumennina. „Það eiga allir að fara í þessa skimun. Ef þeir eru með vopn vegna sinnar vinnu þarf að láta vita af því þegar þeir koma í skimunina,“ segir Valdís Ásta Aðalsteinsdóttir.gar@frettabladid.is