Gunnar Oddson íhugar að hætta með lið Þróttar

Gunnar Oddsson, þjálfari Þróttar var niðurbrotinn eftir annað 1-5 tap liðsins í röð í Pepsideildinni í kvöld. Hann segist framtíð sína hjá liðinu vera í óvissu.

„Þetta er skelfilegt og sérstaklega að tapa svona á heimavelli. Við vorum andlausir eftir að þeir skora annað markið. Mér fannst við koma með smá neista í þetta í stöðunni 1-1. Svo þegar þeir setja annað markið sitt þá misstum við kjarkinn og þetta fjaraði smá saman úr hjá okkur. Það voru alltof margir leikmenn að spila undir getu," sagði Gunnar og hann viðurkennir að staða liðsins á botninum er ekki björt.

„Þetta lítur ekki vel út og það þarf klárlega að vera mikil breyting á ef ekki á illa fara," sagði Gunnar Oddsson sem íhugar nú sína framtíð sem þjálfara liðsins.

„Mín staða hlýtur að vera mjög slæm eftir þetta tap. Maður hlýtur að íhuga það vel að hætta með liðið eftir svona leik," sagði Gunnar Oddsson.