Segist hafa útskýrt málin fyrir dómara

Erlendur Gíslason, skiptastjóri Baugs, mun halda áfram sem skiptastjóri þrotabús Baugs, þrátt fyrir gagnrýni í fjölmiðlum vegna starfa sem lögmannsstofan Logos, sem Erlendur er meðeigandi í, vann vegna fjárfestinga sem tengjast Baugi. Erlendur segir í samtali við fréttastofu að dómari hafi vitað um að Logos hefði á undanförnum árum unnið að tveimur eða þremur málum sem væri öllum lokið og hefðu ekki áhrif á störf hans sem skiptastjóra. „Og inn í þessum tveimur, þremur málum væru mál þar sem Baugur væri ekki einu sinni viðsemjandi, bara tengjast Baugi," segir Erlendur.

„Aðalatriðið er að allt þetta moldviðri byrjaði þegar einhver segir að við séum lögmenn Baugs. Að við séum stofan sem Baugur leitar alltaf til," segir Erlendur. Hann segir þetta vera rangt og bendir á að sú lögmannsstofa sem Baugur hafi átt mest viðskipti við sé Lögmenn Höfðabakka. Erlendur bendir auk þess á að hann sé að vinna að því að gæta hagsmuna kröfuhafa Baugs og jafnræðis þeirra á milli.

Dómsstjóri í Héraðsdómi Reykjavíkur segir að það eina sem dómurinn hafi um málið að segja sé að áður en Erlendur var skipaður skiptastjóri í þrotabúi Baugs Group hafi dómari innt hann eftir því hvort fyrir hendi væru einhverjar þær aðstæður er leiddu til vanhæfis hans sem skiptastjóra og hafi hann ekki kveðið svo vera.

Þá hefur Erlendur sent frá sér yfirlýsingu vegna fréttar á Vísi og í Bylgjufréttum í morgun um kaupmála milli hans og konu hans. Tekur Erlendur fram, að gerð kaupmálans hafi ekkert haft með fjárhagslega stöðu hans að gera. Hann og LOGOS lögmannsþjónusta muni ekki víkja sér undan því að svara fyrir faglegt hæfi sitt og lögmannsstofunnar til að Erlendur gegni starfi skiptastjóra í þrotabúi Baugs Group hf. Hins vegar óski hann þess að persónuleg málefni sín verði ekki að ósekju dregin inn í umræðu um hæfi sitt.