Tevez ekki með á móti Arsenal - vonandi klár fyrir Manchester-slaginn

Carlos Tevez verður ekki með Manchester City í stórleiknum á móti Arsenal um næstu helgi en Tevez meiddist á hné í leik Argentínu og Brasilíu í undankeppni HM um síðustu helgi. Mark Hughes, stjóri City, vonast til að Tevez verði orðinn góður fyrir nágranna- og derby-slaginn á móti Manchester United sem fram fer eftir tæpar tvær vikur eða 20. september.

„Við heyrðum af því í gær að Carlos væri meiddur á hné. Okkar læknir er búin að tala við læknalið argentínska landsliðsins og þeir telja að hann geti ekki spilað um helgina. Hann verður vonandi orðinn góður fyrir United-leikinn en við vitum það ekki fyrr en hann kemur til baka frá Argentínu," sagði Hughes á heimasíðu Manchester City.

Carlos Tevez verður þó áfram í Argentínu þrátt fyrir að geta ekki tekið þátt í leiknum á móti Paragvæ á morgun. Ástæðan er að Tevez þarf að fá rétta meðferð strax og það er óttast að löng flugferð á þessari stundu gæti gert illt verra.

Brasilíumaðurinn Robinho meiddist einnig í leik Brasilíu og Argentínu en City-menn telja að hann verði orðinn góður fyrir leikinn á móti Arsenal.