Lampard vill horfa jákvætt á bannið - gæti þjappað liðinu betur saman

Frank Lampard er á því að Chelsea-liðið gæti nýtt sér það að liðið megi ekki kaupa nýja leikmenn fyrr en árið 2011. Chelsea var sett í bann hjá FIFA vegna vinnubragða félagsins við að næla í Frakkan Gael Kakuta frá RC Lens. Flestir eru á því að Chelsea þurfi að styrkja leikmannahópinn á þessum tíma til að berjast um titlana í boði en Lampard trúir því að liðsheildin gæti orðið enn sterkari við þetta bann.

„Ég hef gengið í gegnum ýmislegt á mínum ferli með Chelsera og enska landsliðinu en það er jafnan þannig að þegar liðið er komið upp að vegg þá þjappa menn sér betur saman og það getur verið jákvætt," segir Lampard.

„Við megum alls ekki líta neikvæðum augum á þetta bann því þetta er hvort sem ekki í höndum leikmannanna sjálfra. Það eina sem við getum gert er að líta jákvæðum augum á framhaldið," sagði Lampard. Þó að John Terry sé síðasti leikmaðurinn sem hefur skilaði sér inn í aðalliðið upp úr yngri flokka starfi Chelsea þá hefur Lampard enn mikla trú á akademíu félagsins.