„Ég er bara búin að vera í búðum frá því að ég opnaði síðuna á mánudaginn," segir Elísabet Gunnarsdóttir. Hún hefur nú opnað vefsíðu þar sem hún gefur Íslendingum möguleika á að versla í öllum helstu tískuvöruverslunum í Svíþjóð og sendir fólki vörurnar heim. Þá getur fólk ýmist verslað sjálft í netverslunum búða sem senda ekki til Íslands í gegnum heimilisfang Elísabetar, eða beðið hana að kaupa tilteknar vörur og senda sér gegn vægu þjónustugjaldi.

„Ég held að það hafi tíu þúsund manns heimsótt síðuna fyrsta sólarhringinn og ég er búin að fá mjög margar pantanir. Ég er bara nýflutt hingað út, en kærastinn minn, Gunnar Steinn Jónsson, er að spila handbolta með HK Drott. Ég er búin að vinna hjá NTC í mörg ár heima og verið mikið í kringum föt og tísku frá því að ég man eftir mér. Mér fannst þetta henta mjög vel fyrir mig núna þar sem ég er í fæðingarorlofi. Þetta hentar líka vel núna í ástandinu heima, því 2007 gátu allir skellt sér í verslunarferðir, en nú er það ekki lengur inni í myndinni," útskýrir Elísabet og segist mest hafa verið í skókaupum fyrir viðskiptavini síðustu daga.

„Ég tek 2.500 krónur fyrir að kaupa flík eða vöru og svo bætast við 1.000 krónur við fyrir hverja flík sem ég kaupi í viðbót auk sendingarkostnaðar, en teknar eru 2.500 krónur ef verslað er í netverslun og sent á mitt heimilisfang, óháð fjölda vara. Allir hafa verið mjög sáttir við þetta og mér finnst þetta rosalega gaman. Ég hef ekki efni á að kaupa allt sem mig langar í svo það er flott að geta gert það fyrir aðra," bætir hún við. Frekari upplýsingar má sjá á síðu Elísabetar, elisabetgunnars.tk.
- ag