Halldór Orri: Væri fínt að spila við Þrótt í hverri viku

„Við vorum orðnir ansi æstir í að ná þremur stigum eftir að hafa tapað tveimur leikjum í röð gegn liðum í neðri helmingnum. Þetta var kærkominn sigur," segir Halldór Orri Björnsson sem átti frábæran leik fyrir Stjörnuna þegar liðið burstaði Þrótt 5-1 á fimmtudag. Hann er leikmaður umferðarinnar hjá Fréttablaðinu.

Halldór gat ekki tekið þátt í umferðinni á undan vegna leikbanns en þá tapaði Garðabæjarliðið fyrir Grindavík. „Ég horfði á þann leik úr stúkunni og það var grátlegt að sjá hvernig við töpuðum niður forystunni þar. Ég var orðinn æstur í að spila og fann mig vel í þessum leik gegn Þrótti," segir Halldór en Stjarnan vann 6-0 sigur þegar liðið mætti Þrótti í fyrri umferðinni.

„Það væri ekki verra ef við gætum spilað við þá í hverri viku miðað við þessa tvo leiki á móti þeim. Ég hef enga sérstaka skýringu á því af hverju okkur gengur svona vel á móti þeim en 11-1 í tveimur leikjum er ansi mikill markamunur. Við drápum leikinn í fyrri hálfleik með því að komast í 3-0. Við náðum flottum mörkum eftir föst leik­atriði og það var hálfgert formsatriði að klára seinni hálfleikinn."

Mikið hefur verið rætt um gervigrasvöll Stjörnunnar en liðið hefur fengið langflest stig sín á honum.

„Heimavöllurinn hefur reynst okkur drjúgur. Við höfum enn ekki tapað leik hérna, erum komnir með 19 af 23 stigum á heimavelli. Svo má ekki gleyma stuðningsmönnunum sem eru líklega þeir bestu á landinu. Þeir eru að standa sig vel í frystikistunni eins og við köllum stúkuna okkar. Það er alltaf kalt þarna sama hvernig veðrið er," segir Halldór.

Mætingin á leiki Stjörnunnar hefur verið döpur síðustu ár en nú iðar allt af lífi í Garðabæ. „Nokkrir félagar mínir tóku sig til á miðju sumri í fyrra. Þeir fjölmenntu á leiki með trommur og söngva. Við töpuðum síðan ekki leik í seinni umferðinni svo það sést alveg að stuðningsmennirnir eiga stóran þátt í þessu," segir Halldór Orri Björnsson.