Svínaflensan skrefi nær því að verða heimsfaraldur

Alþjóða heilbrigðisstofnunin segir að svínaflensan sé skrefi nær því að verða heimsfaraldur. Það sé þó ekki óhjákvæmilegt að svo fari.

Sérfræðingar Alþjóða heilbrigðisstofnunarinnar segja að ekki sé hægt að koma í veg fyrir útbreiðslu svínaflensunnar þar sem hún smitast á milli manna.

Hinsvegar sé hægt að hægja svo á útbreiðslunni að yfirvöldum gefist tóm til þess að verða sér út um lyf ef þess gerist þörf.

Þeir benda á að það sé enginn dauðadómur að smitast af flensunni. Í langflestum tilfellum gangi hún yfir á viku eða svo. Ef tilfelli séu slæm séu til lyf sem virki mjög vel.

Alþjóða heilbrigðisstofnunin hefur lýst yfir fjórða viðbragðsstigi en þau eru samtals sex. Sjötta stig þýðir að heimsfaraldur geisar og er þá gripið til allra tiltækra ráða.

Almenningsstöðum er lokað og jafnvel heilu héruðin einangruð. Á þessu stigi er ómögulegt að segja til um hvernig fer.

„Fjórða stigið er raun vendipunktur. Þetta gætist þróast í fimmta stig sem þyðir í raun heimsfaraldur," segir Gregory Hartl sérfræðingur hjá Alþjóða heilbrigðisstofnuninni.

Það veldur heilabrotum að fólk hefur hvergi látist nema í Mexíkó. Tilfelli í öðrum löndum hafa verið frekar mild. Það gæti þýtt að dánarorsakir þar í landi megi rekja til fleiri þátta en bara flensunnar.