LOGOS vann að yfirtöku Baugs á Mosaic

LOGOS lögfræðistofa vann að yfirtöku Baugs Group á Mosaic Fashion Ltd. að andvirði 406 milljóna punda sem voru með stærri kaupum á Íslandi í ágúst 2007. Stefán Hilmar Hilmarsson fjármálastjóri Baugs segir að kaupin hafi farið í gegnum Kaupþing sem hafi m.a séð um afskráningu úr Kauphöll. Lögmaður segir engan vafa mega ríkja um hvort skiptastjóri hafi unnið fyrir þrotafélag.

Gunnar Sturluson faglegur framkvæmdarstjóri lögfræðistofunnar sagði í frétt á Vísi fyrr í dag að lögfræðistofan hefði aldrei unnið fyrir Baug. Tilefni þess var að Erlendur Gíslason einn eigenda stofunnar var skipaður skiptastjóri Baugs í morgun.

Sveinn Andri Sveinsson lögmaður segir aðspurður um málið að þegar héraðsdómari skipi skiptastjóra kanni hann annarsvegar hvort umræddur lögmaður eða stofa hans hafi unnið fyrir gjaldþrotafélag og hinsvegar hvort umræddur lögmaður eða stofa eigi kröfur á hendur viðkomandi þrotafélagi. „Nú þekki ég ekki nákvæmlega hvað kollegar mínir á LOGOS hafa unnið fyrir Baug en ef þeir hafa gert það þá myndu þeir ekki teljast hæfir," segir Sveinn Andri.

Hann segir að hinsvegar gæti líka komið til skoðunar hvort umræddur skiptastjóri eða stofa hans hafi verið að vinna fyrir fyrirtæki sem eru tengd Baugi og nefnir þar t.d Stoðir, áður FL Group.

Sveinn Andri tekur þó fram að Erlendur Gíslason sé toppmaður og allt gott um hann að segja. „Það sem er hinsvegar eðli starfs skiptastjóra er að hann er umboðsmaður kröfuhafa og því má ekki ríkja neinn vafi þar sem þarna eru gríðarlegir hagsmunir í húfi."

Á heimasíðu LOGOS kemur fram að stofan kom að umræddri yfirtöku á Mosaic Fashion í ágúst 2007. Stefán Hilmar Hilmarsson fjármálastjóri Baugs segir að Kaupþing hafi stýrt yfirtökunni. „Það getur verið að þeir hafi unnið fyrir Kaupþing í því máli en þeir unnu ekki fyrir okkur, enda áttum við bara 33% hlut á þessum tíma. Það var Kaupþing sem stýrði afskráningu úr Kauphöllinn og öllu sú vinna fór í gegnum þá."

Á heimasíðunni kemur einnig fram að LOGOS veitti ráðgjöf vegna tilkynningar um samruna Bláfugls, Flugflutninga og FL Group til samkeppnisyfirvalda auk samruna FL Group og Sterling Airlines.