Sveitarstjóri býður ráðherra VG velkomna í skoðunarferð

Ráðherrar vinstri grænna hafa boðað friðlýsingu Gjástykkis en virðast ekki vita að sveitastjórnir á svæðinu hafi nýlega lagt til friðlýsingu á lang stærstum hluta þess og er orkuvinnsla aðeins heimil á um tveimur prósentum svæðisins samkvæmt nýlegu svæðisskipulagi. Sveitarstjóri Norðurþings býður ráðherra VG því velkomna norður til þess að kynna sér málin.

Þetta segir í yfirlýsingu frá Bergi Elíasi Ágústssyni sveitarstjóra Norðurþings. Hann bendir á að Gjástykki sé ríflega 110 ferkílómetra stórt svæði sem nær frá landamerkjum Skútustaðahrepps í suðri norður að Kerlingahól í Kelduhverfi og er svæðið að mestu í Norðurþingi. „Rannsóknir hafa leitt í ljós að jarðhitasvæði Gjástykkis er um 10 km2 að stærð og er sá hluti svæðisins í sveitafélögunum Norðurþingi, Þingeyjarsveit og Skútustaðahreppi," segir Bergur.

Að hans sögn eru helstu náttúruperlur svæðisins við Sandmúlann rétt sunnan Gjástykkis, á svæðinu norðan Hituhóla og við Hrauná suðvestan við Hrútafjöll. „Við afmörkun orkuvinnslusvæða í svæðisskipulaginu var kappkostað að forðast rask nálægt þessum náttúruperlum og sveitafélögin á svæðinu voru sammála um að aðeins mætti nýta 2% (2 km2) af þessu víðfeðma svæði til orkuvinnslu. Því hefur verið lagt til að stærsti hluti svæðisins verið friðlýstur í svæðisskipulagi," segir sveitarstjórinn.

Hann bendir einnig á að helmingur orkuvinnslusvæðisins eða um 1 ferkílómetri er á nýjum hraunum sem runnu í Kröflueldum 1975-1984. Þessi hraun þekja samtals um 36 ferkílómetra og nær orkuvinnslusvæðið því einungis yfir tæp 3 prósent af nýju hraununum.

„Rannsóknarholum sem nú eru í umhverfismati hefur verið valin staður á akvegi sem var ruddur í gegnum hraunið skömmu eftir Kröfluelda. Nú þegar hefur verið boruð ein 600 m djúp rannsóknarhola á þessum stað og reyndist botnhiti vera um 200°C. Nýju holunum er ætlað að kanna hita og lekt jarðlaga á 800-2500 m dýpi, segir Bergur Elías og bætir við:

„Ráðherrar vinstri grænna eru velkomnir hingað norður til þess að kynna sér svæðið og sjá með eigin augum hvar fyrirhuguð orkuvinnsla mun fara fram, verði af henni."