Leigubílstjórar ósáttir við nýja leigubílastæðið í Hafnarstræti

Leigubílstjórar eru margir hverjir ósáttir við þær breytingar sem gerðar hafa verið í miðborginni en leigubílaskýlið sem staðið hefur við Lækjargötu hefur verið flutt inn í Hafnarstræti. Jóhann Sigfússon formaður Bifreiðastjórafélagsins Átaks segist ekki vita um einn einasta leigubílstjóra sem sé sáttur við breytingarnar enda sé nýja staðsetningin afar slæm. Hann segir að leikubílstjórar muni flestir hunsa nýja stæðið.

„Eru ekki bara fjórir eða fimm ánægðir með þetta? Eða hvað er nefndin sem ákvað þetta stór?," spyr Jóhann. „Í fyrsta lagi er þetta inni á miðjum rúntinum hjá almenningi á helgum. Í öðru lagi er ekkert stæði til að stoppa við, þetta er bara á miðri götunni og það eru ekki einu sinni tvær akgreinar þarna. Þarna teppist því allt. Í þriðja lagi er rautt ljós í götunni sem myndar líka tappa."

Jóhann bendir líka á að aðkoman að stæðinu sé mjög óhentug fyrir leigubílana sem þurfa að þræða sig í gegnum götur miðbæjarins til þess að komast að stæðinu. Hann segir að gamla staðsetningin í Lækjargötu hafi verið mun betri þó best hefði verið að færa skýlið aðeins innar í götuna, nær Menntaskólanum í Reykjavík. „En þessi staður er sá al lélegasti sem hægt var að finna upp á held ég."

Jóhann segist ekki átta sig á því hvers vegna gripið var til þessara breytinga. „Menn fara ekkert þarna og munu ekkert nota þetta. Menn eru líka hræddir um bílana sína þarna. Þetta þarf að vera á stað þar sem menn geta komist auðveldlega að og auðveldlega í burtu. Ég get ekki ímyndað mér annað en að lögreglan sé líka óhress með þetta."