Tvö þúsund ásælast Haga

Viðskiptamaðurinn Guðmundur Franklín Jónsson sagði í viðtali við Egil Helgason í þættinum Silfur Egils í hádeginu að tvö þúsund áhugasamir fjárfestar væru tilbúnir að kaupa Haga.

Guðmundur hefur haldið úti síðunni þjóðarhagur.is þar sem áhugasamir geta skráð sig og lagt fé í púkkið.

Guðmundur er ósáttur við framgöngu Kaupþings í málinu en Hagar eru í gjörgæslumeðferð hjá bankanum. Hann segir feðgana, það er að segja Jóhannes Jónsson og son hans Jón Ásgeir, skulda 1100 milljarða samanlagt og að þeir hafi farið með hvert fyrirtækið á eftir öðru í þrot.

„Við teljum óhæft að það sé endalaust verið að gefa þeim peninga," sagði Guðmundur í viðtalinu við Egil og bætti við að þeir þyrftu aldrei að borga skuldirnar sína á meðan þjóðin þyfti að standa skil á sínu.

Þá sagði Guðmundur einnig að þó skuldir yrðu ekki afskrifaðar þá myndu þær skila sér inn í hærra matvöruverð og það myndi aftur auka verðbólgu.

Eigendur Haga er eignarhaldsfélagið 1998 sem aftur er í eigu Jóhannesar Jónssonar og fjölskyldu. Guðmundur sagði í viðtalinu að skuldir félagsins séu um 50 milljarðar króna.

Þess má geta að forsvarsmenn Haga hafa neitað því alfarið að króna hafi verið afskrifuð af skuldum Haga.

Í viðtalinu skoraði Guðmundur á Jóhannes í Bónus að mæta Agli í Silfri Egils og ræða matvörumarkaðinn. Þess má geta að Egill tók frægt viðtal við son hans Jón Ásgeir stuttu eftir hrun.