Ólafur Þór Gunnarsson í markið hjá Fylkismönnum

Ólafur Þór Gunnarsson mun taka fram markmannshanskana á ný og verja mark Fylkismanna það sem eftir lifir af tímabilinu en Fjalar Þorgeirsson markvörður liðsins, handarbrotnaði í síðasta leik.

Ólafur Þór tók þátt í tveimur leikjum ÍR í 2. deildinni í fyrra en spilaði síðast heilt tímabil með Þrótti sumarið 2007 en varð í kjölfarið að hætta vegna meiðsla. Ólafur hefur ekki leikið í úrvalsdeildinni síðan að hann stóð í marki Vals sumarið 2003.

„Það hjálpar okkur klárlega að vera búnir að fá markmann. Við vorum með einn markmann en það er algjörlega nauðsynlegt fyrir okkur að hafa tvo markmenn," sagði Ólafur Þórðarson, þjálfari Fylkis.

„Þetta var sorglegt fyrir bæði Fjalar og liðið að missa Fjalar. Hann er búinn að vera einn besti maður liðsins í sumar og það er mikið skarð höggið í liðið hjá okkur við þetta. Við vonumst bara að þeir sem eru hjá okkur núna nái að fylla í hans skarð," segir Ólafur en fyrir hjá liðinu var varamarkvörðurinn Daníel Karlsson.

Ólafur Þórðarson hefur ekki áhyggjur af því að Ólafur Þór sé ekki búinn að spila í langan tíma. „Hann hefur verið að æfa og er í ágætu formi. Ólafur stóð sig mjög vel á æfingunni áðan eins og við var að búast," sagði Ólafur.

Þeir voru saman hjá ÍA þegar Ólafur þjálfaði nafna sinn frá 2000 til 2002. „Ég var með hann í þrjú ár upp á Skaga og við vorum Íslandsmeistarar saman. Ég þekki því vel til hans, er með reynslu af honum og þekki karakterinn," sagði Ólafur en hann er ekki búinn að ákveða hvor þeirra byrjar í bikarleiknum á móti Fram á morgun.

„Ég er ekki búinn að ákveða hvor þeirra stendur í markinu á morgun en að kemur bara í ljós," sagði Ólafur að lokum.