Einkaspítalinn vonandi ekki reistur á loftköstulum

„Ég hef ekki aldrei verið hugfanginn að markaðsvæðingu á heilbrigðisþjónustu en ég hef í sjálfu sér ekkert við einkaspítala að athuga fyrr en farið er að gera út á skattgreiðendur," segir Ögmundur Jónasson, heilbrigðisráðherra, aðspurður um fyrirhugaðan einkaspítala og heilsuhótel.

Stefnt er að því að hefja byggingu á einkaspítalans á næsta ári. Forsvarsmenn spítalans telja að starfsemin muni geta skilað allt að 10 þúsund ferðamönnum til landsins og rúmlega 10 milljörðum í gjaldeyristekjur. Fyrirhugaður spítali verði byggður upp á grænum gildum, að sögn framkvæmdastjóra Primacare sem stendur á bak við verkefnið. Fjallað var um spítalann í Kastljósi fyrr í kvöld.

Ögmundur segir að svo framarlega sem gæðakröfum sé fullnægt sé ekkert sem komi í veg fyrir að fjárfestar setji á fót sjúkrahús hér á landi á meðan ekki sé gert út á skattgreiðendur. Lúxusspítalar fyrir efnafólk hafi skotið uppkollinum víða undanfarin ár, ekki síst í Tælandi og Suðaustur-Asíu.

„Ég vona að þessu fyrirtæki gangi vel og reksturinn reynist hvorki áhættusamur né byggður á loftköstulum," segir ráðherrann.

Ögmundur segir að það strandi ekki á sér að ræða við forsvarsmenn fyrirtækisins um fyrirhugaðan einkaspítala.

- Heilsuspítali mun skila milljörðum í gjaldeyristekjur