Mancienne á leið aftur til Wolves

Allt útlit er fyrir að varnarmaðurinn Michael Mancienne verður aftur lánaður til Wolves frá Chelsea rétt eins og á síðasta keppnistímabili.

Mancienne mun leika með Wolves allt næsta tímabil og var von á honum til félagsins í dag. Hann lék í gær með U-21 landsliðið Englands sem gerði markalaust jafntefli viðo Holland.

Mancienne á hins vegar aðeins ár eftir af samningi sínum og er talið að hann muni skrifa undir nýjan samning við félagið fljótlega.

Hann mun vera áhugasamur um að fá að spila með Wolves í ensku úrvalsdeildinni í vetur til að auka líkurnar á því að hann komist í landsliðshóp Englands fyrir HM í Suður-Afríku næsta vetur.