Owen: Rooney næstum jafn spenntur og ég

Michael Owen hefur greint frá því að Wayne Rooney var næstum jafn spenntur og hann fyrir því þegar Owen kom til Manchester United nú fyrr í sumar.

„Wayne Rooney hringdi í mig áður en ég skrifaði undir því hann hafði heyrt orðróm þess efnis að ég væri á leiðinni til United. Hann var í fríi en hringdi í mig til að athuga hvort þetta væri rétt," sagði Owen í samtali við enska fjölmiðla.

„Hann var kannski ekki alveg jafn spenntur og ég en það mátti ekki muna miklu," bætti hann við.

Fréttirnar af félagaskiptum Owen komu mörgum í opna skjöldu en hann samdi við United í upphafi júlímánaðar.