Bendtner ætlar í lukkunúmerið 52

Daninn Nicklas Bendtner hjá Arsenal hefur ákveðið að skipta um treyjunúmer fyrir tímabilið. Hann vonar að nýja númerið muni skila honum fleiri mörkum.

Hann hefur hingað til leikið í treyju númer 26 en mun leika með númerið 52 á bakinu í vetur.

„Ég er mjög spenntur fyrir tímabilinu sem er framundan og hef trú á að það verði gott. Ég ákvað líka að hætta að spila með 26 á bakinu og verð númer 52 núna því sú tala skiptir mig miklu máli persónulega. Vonandi færir númerið mér gæfu," sagði Daninn sem skoraði 15 mörk í 50 leikjum á síðustu leiktíð.

Þeir stuðningsmenn Arsenal sem hafa þegar keypt Bendtner-treyju fyrir tímabilið með númerinu 26 á bakinu þurfa ekki að örvænta.

„Ég mun persónulega endurgreiða þeim stuðningsmönnum sem hafa keypt treyju fyrir tímabilið með 26 á bakinu. Þeir geta fengið nýja treyju með 52 á bakinu. Það skiptir mig miklu máli að sjá fólk í minni treyju í stúkunni," sagði Daninn.