Umfjöllun: Framarar úr leik í Evrópudeildinni

Framarar eru úr leik í Evrópudeildinni eftir 2-0 tap fyrir tékkneska liðinu SK Sigma á Laugardalsvelli í kvöld. Fyrri leiknum lauk með 1-1 jafntefli og vinnur Sigma því 3-1 samanlagt.

Fyrri hálfleikurinn spilaðist líklega alveg eins og Framarar hefðu beðið um fyrir leikinn. Lið Sigma var meira með boltann en Fram, sem stillti upp fimm manna varnarlínu, náði að halda sóknarmönnum Sigma ágætlega í skefjum. Skyndisóknir Framara voru svo oft á tíðum hættulegar en þó vantaði herslumuninn hjá Fram til að skapa sér verulega hættuleg tækifæri.

Staðan í hálfleik var markalaus og Framarar á leiðinni áfram miðað við þá stöðu. En strax á 47.mínútu skoraði Michael Hubnik fyrir SK Sigma með skalla eftir fyrirgjöf frá vinstri. Hubnik stóð aleinn á fjærstönginni og voru varnarmenn Framara ótrúlega sofandi þegar Hubnik skallaði knöttinn í netið.

Eftir markið var eins og leikmenn Fram misstu alla trú á verkefninu. SK Sigma sótti í sig veðrið og þegar Rudolf Otepka skoraði annað mark liðsins á 58.mínútu var öll von úti fyrir heimamenn. Otepka fékk boltann rétt við vítateigslínuna og setti boltann innanfótar framhjá Hannesi Þór Halldórssyni í marki Fram.

Lítið markvert gerðist eftir þetta. Leikmenn Sigma héldu boltanum vel sín á milli og Framarar fengu fá tækifæri til að koma sér inni í leikinn á nýjan leik. Bæði lið virtust átta sig á því að úrslitin væru ráðin, lokatölur 2-0 fyrir Sigma sem eru því komnir áfram í næstu umferð.



Fram – SK Sigma

Laugardalsvöllur. Áhorfendur: 1226

Dómari: Paulo Manuel Costa

Mörk: 0-1 Michael Hubnik (47.mín), 0-2 Rudolf Otepka (58.mín)

Skot (á mark): 7 (3) – 14 (8)

Varin skot: Hannes 5 – Drobisz 3

Horn: 3 – 6

Aukaspyrnur fengnar: 13  – 11

Rangstöður: 3 – 0

Fram (5-3-2)

Hannes Þór Halldórsson

Heiðar Geir Júlíusson

Kristján Hauksson

Auðun Helgason

Jón Guðni Fjóluson

Samuel Tillen

Halldór Hermann Jónsson

Ingvar Ólason

(68 Daði Guðmundsson)

Paul McShane

Hjálmar Þórarinsson

Almarr Ormarsson

SK Sigma (4-3-3)

Petr Drobisz

Daniel Rossi Silva

Pavel Dreksa

Ales Skerle

Ladislav Onofrej

Marek Kascak

(80 Lukas Baner)

Tomas Horava

(89 Michal Veprek)

Rudolf Otepka

Tomas Janotka

Pavel Sultes

Michael Hubnik

(74 Caihame Steines Jorge)