Zarate á innkaupalista Liverpool og City?

Argentínumaðurinn Mauro Zarate hjá Lazio á Ítalíu er eftirsóttur af liðum í ensku úrvalsdeildinni ef marka má breska fjölmiðla í dag.

Zarate er á lánssamningi hjá ítalska félaginu frá Al-Sadd í Katar, en hinn 22 ára gamli markahrókur hefur sett 11 mörk í 30 leikjum fyrir Rómarliðið í vetur.

Hann var áður á lánssamningi hjá Birmingham á Englandi þar sem hann skoraði 4 mörk í 14 leikjum, en verðmiðinn á honum var of hár fyrir enska félagið.

Talið er að félag Zarate gæti farið fram á allt að 20 milljónir punda fyrir leikmanninn, en góð frammistaða hans í vetur hefur orðið til þess að hann hefur verið orðaður við argentínska landsliðið.

Liverpool og Manchester City eru á meðal þeirra liða sem sögð eru hafa áhuga á að kaupa Zarate í sumar.