Defoe kominn af stað á ný

Framherjinn Jermaine Defoe hjá Tottenham er nú byrjaður að æfa á fullu með liði sínu eftir að hafa verið frá keppni síðan í janúar vegna meiðsla.

Defoe var með brákað bein í fæti en nú er farið að styttast í að hann fari að spila á ný.

"Þetta eru frábærar fréttir fyrir okkur. Jermain gat ekki sofið nóttina fyrir fyrstu æfinguna því hann var svo spenntur að snúa aftur. Hann skoraði nokkur flott mörk á æfingunni og leit vel út. Það er bónus að fá hann til baka og ég er ekki frá því að hann eigi eftir að skora nokkur mörk fyrir okkur fyrir lok leiktíðar," sagði Harry Redknapp knattspyrnustjóri Tottenham.