„Ég geri allt fyrir dóttur mína,“ segir móðir annarrar stúlkunnar

Móðir annarrar stúlkunnar sem handtekin var í Englandi og er fædd árið 1990, segir í samtali við fréttastofu að dóttir sín hafi ekki fengið þá aðstoð sem hún hafi þurft hjá Barnaverndaryfirvöldum.

Stúlkan er harður fíkniefnaneytandi en móðirin segist gera allt sem í hennar valdi stendur til að aðstoða dóttur sína. Eins og komið hefur fram á Vísi og í fréttum Stöðvar 2, hafa tvær íslenskar stúlkur verið handteknar á Englandi en þær eru grunaðar um innbrot í Lundúnaborg.

„Stúlkurnar voru týndar í fjóra daga, í upphafi taldi Alþjóðalögreglan að þeim hefði verið rænt þar sem þær hurfu sporlaust. Annað kom hins vegar á daginn. Ég horfi ekki framhjá staðreyndum, dóttir mín hefur verið í mikilli neyslu um árabil og ég hef gert allt sem í mínu valdi stendur til að aðstoða barnið mitt," segir móðir stúlkunnar.

Móðirin frétti fyrst á miðvikudagskvöldið í siðustu viku að stúlkurnar væru fundnar og þeim hefði ekki verið rænt, eins og Alþjóðalögreglan taldi.

Í byrjun maí fór dóttir konunnar til Englands og sagðist hún hafa fengið vinnu á hóteli þar í landi. Móðirin hefur ekkert fengið að heyra í dóttur sinni síðan hún var handtekin. Að sögn móðurinnar geta fangar einungis hringt úr fangelsinu en ekki móttekið símtöl.

„Þetta mál er allt saman í vinnslu en á morgun eða á fimmtudag á ég von á því að heyra meira um málið. Mér þykir þetta alveg skelfilegt, þetta er nú einu sinni barnið manns sem maður vill aðstoða af öllu hjarta," segir móðirin.

Stúlkan sem um ræðir er harður fíkniefnaneytandi, en hún á langan afbrotaferil að baki hér á landi.

Móðirin hefur reynt allt hvað hún getur til að aðstoða dóttur sína síðan hún var þrettán til fjórtán ára gömul, en telur að dóttir sín hafi ekki fengið þá aðstoð sem henni bar.

Móðirin gefur Barnaverndaryfirvöldum ekki háa einkunn.

„Ég hef ætíð viljað gera allt sem í mínu valdi stendur til að aðstoða barnið mitt. Ég lít ekki framhjá því að dóttir mín er fíkniefnaneytandi, en hún þarf utanaðkomandi aðstoð. Í þau skipti sem ég hef haft samband við Barnaverndaryfirvöld, er mér einfaldlega tjáð að það sé mjög mikið að gera hjá þeim og þau séu með fleiri með vandamál á sinni könnu," segir móðirin að lokum.